FUNDACIÓN LUÍS SEOANE

O día 24 de marzo, dentro do programa municipal "Coruña de Aventura", visitamos a sede da Fundación Luís Seoane, na Cidade Vella de A Coruña.
A experiencia resultou moi interesante e innovadora. Constou de dúas partes:

Parte 1ª:

- As cores como parte integrante da luz. Visitamos unha vidreira feita de tubos cheos de auga, na que observamos as combinacións das cores primarias (cián, maxenta e amarelo).
- Visión de imaxes en 3D (tridimensionais), como efecto óptico conseguido a través da manipulación da luz, cunha breve mostra de experiencias históricas sobre este tema.
- Confección de vidreiras combinando as tres cores primarias.

Parte 2ª:

-Visita a unha exposición de carteis de exposicións de Picasso, tema de moita actualidade na cidade pola exposición do Museo de Belas Artes. Nela poidemos contemplar un retrato de Picasso feito por Luís Seoane.
Permitiunos observar diferentes técnicas de debuxo e pintura, que despois intentamos reproducir na aula.
Toda esta información completámola con informacións recollidas na Internet.

ECOSISTEMAS

Para estudar os ecosistemas confeccionamos un terrario, cos elementos inertes do ambiente (pedras, terra e auga), varias especies vexetais e dúas especies animais (caracois e miñocas). Observamos as súas relacións.

OS EUROS

Para coñecer o diñeiro e as moedas e billetes usamos na aula reproduccións "facsimil", coas que administramos premios e multas (economía de fichas) e realizamos de cando en vez compras nunha tenda na clase.

 Todo este traballo obríganos a realizar operacións matemáticas, tanto mentais como algorítmicas, e sempre cunha notábel motivación do alumnado.

O traballo cos céntimos anticipa o uso da coma e da numeración decimal, así como a relación entre centímetro e metro, unidades de lonxitude que aprenderemos este curso.

Como experiencia nova tivo lugar unha sub-hasta na que cada neno/a recontaba os cartos dos que dispuña, ofertábase un produto cun prezo de saída, o alumnado poxaba á suba (levantando a man e dicindo canto ofrecía) e o que ofrecese máis levaba o produto ofertado tras pagar o prezo que el/ela mesmo lle puxera.

A condición clave era que, se alguén ofrecía máis diñeiro do que tiña, perdía todo o seu capital e quedaba sen o produto por non poder pagalo. Así traballamos a comparación de números e o valor das compras responsabeis.

MULTIPLICACIÓNS E XEOMETRÍA

Como reforzo manipulativo e visual do concepto da multiplicación (sumas de sumandos iguais), compuxemos en varias ocasións rectángulos con boliñas de papel formados por un certo número de columnas coa mesma cantidade de boliñas.
A figura conseguida traducíase nunha multiplicación da que o resultado era o número total de boliñas empregadas. Así facemos de modo manipulativo un paso dende a xeometría (máis intuitiva e vivencial) á aritmética (máis abstracta), anticipando conceptos tan esenciais para a vida como:
 "multiplicación = suma de sumandos iguais"
 "multiplicación = filas x columnas"
 "superficie = longo x largo"
 "superficie = base x altura"

Fixando o número de bólas que terá cada columna (por exemplo, 4) obtemos multiplicacións cun factor invariábel, e así imos memorizando a táboa de multiplicar do 4.

Un curso máis, remate do 1º Ciclo, amosamos no blog algunhas das actividades realizadas polo alumnado de 2º de EP. Todas son interesantes, pero ningunha substitúe o traballo diario, menos espectacular pero esencial para a aprendizaxe.

CÁGADOS

No primeiro trimestre coidamos na clase uns cágados, nos que observamos a metamorfose que os leva a transformárense en ras. Estes animais, anfibios, supuxeron unha ampliación do currículo establecido, xa que o marcado para este curso referido aos vertebrados era peixes, aves e mamíferos.

Nun primeiro momento alimentámolos con follas de leituga e coas substancias nutritivas da auga.

Despois experimentamos desclorando a auga da billa para cambiala, e alimentámolos con alimento específico para eles adquirido nunha tenda especializada.

Por fin observamos, ademais do aumento de tamaño, o cambio da forma do corpo e o nacemento das patas de atrás.

Estando nestas, chegaron as vacacións de Nadal. Para poder observar o resto do proceso, os pais da alumna que os aportaran fixéronse cargo deles, e retratáronos así, coas patas de diante xa nacidas:

Debido a causas descoñecidas, a metade deles morreron, polo que foi imprescindible ceibalos nun ambiente natural adecuado antes de perderen a cola, feito que suporía a fin do proceso.


Xa no segundo trimestre, como continuación desta actividade, confeccionamos un mural sobre ras e sapos. Nun primeiro momento obtivemos información de diferentes páxinas na Internet.

Máis tarde, unha vez seleccionada e estruturada esta información, pasámola a limpo, confeccionamos os letreiros, aportamos fotos diversas e elaboramos con todo isto o mural.

SEGURIDADE VIAL

Por acordo do Claustro de Mestres, este curso traballouse o tema da Seguridade Vial nas diferentes aulas. A clase de 2º participou nun programa do Concello de A Coruña relativo a este tema. Realizouse un circuito con diferentes sinais horizontais e verticais, coches e peóns, e aprendéronse varias cancións referidas a temas diversos de seguridade vial, que tivemos ocasión de cantar nun concerto celebrado no propio centro.

NADAL

Mesmo antes das vacacións de Nadal recibimos con moita ilusión a visita dos Reis Magos, desfrutamos dunha marabillosa actuación de maxia financiada pola ANPA e asistimos á entrega dos premios do concurso de beléns levado a cabo pola mestra de Relixión.

DÍA DA PAZ

O 30 de xaneiro celebrouse no Centro o Día da Paz, con traballo nas aulas e unha actuación conxunta na que o alumnado, por niveis, elaborou  debuxos alusivos á paz cos que se decoraron as letras da palabra PAZ. Como remate do acto, cantouse unha canción en inglés.

ALLOS

A principio de curso unha alumna aportou uns dentes de allo xerminados que plantamos en clase. Non se lograron completamente, pero observamos as súas raíces e elaboramos un novo mural no que o propio alumnado foi o encargado de repetir, de xeito autónomo, o proceso do anterior mural. O resultado foi moi positivo, aínda que non foron quen de seleccionar as informacións obtidas, o que é normal en alumnado desta idade.

Ao final recapitulamos as fases do proceso a modo de instrucións e avaliamos o resultado, tirando as conclusións oportunas para mellorar en vindeiras ocasións.

EXPERIMENTO: A CIRCULACIÓN NAS PLANTAS

A proposta de Lucía, a mestra de prácticas que traballa na nosa aula esta tempada, realizamos unha experiencia para demostrar que as plantas, como seres vivos que son, teñen un sistema circulatorio que lles permite distribuír as substancias que toman polas raíces a través do talo ata as follas para fabricaren alí o seu alimento.
Partimos de tres caraveis brancos que puxemos en recipientes con auga tinxida. Formulamos hipóteses, observamos o resultado e tiramos a conclusión acertada.

Catro imaxes do proceso:

Máis en detalle:

Para verificar por onde pasou a auga tinxida, observamos talos e sépalos:

Como segunda parte deste experimento, repetímolo con outros tres caraveis brancos, pero cambiándoos de recipiente a medio tinxir. Formulamos hipóteses, observamos e tiramos a conclusión oportuna: as flores non se tinxiron por partes, senón que se mesturaron as cores obtendo un caravel laranxa, outro morado e outro verde.

VISITA AO MUNCYT


O 11 de febreiro visitamos o MUNCYT (Museo Nacional de Ciencia Y Tecnología).
A experiencia foi interesantísima. O alumnado tomou contacto con logros tecnolóxicos actuais (robots, aeronáutica) e co proceso evolutivo da ciencia e a tecnoloxía (automóbil, radio, televior, xoguetes doutros tempos).
Finalmente participaron nun obradoiro no que elaboraron un sixelo helicóptero de papel cada un, coa oportunidade de comprobar o seu funcionamento.