O COCIÑEIRO MARTIÑO

Este curso escollemos a historia do Cociñeiro Martiño como libro de lectura obrigatoria e colectiva. O seu argumento, facilmente comprensíbel para o alumnado de 2º, estrutúrase en tres partes:

Elaboración dun biscoito ( historia acumulativa e facendo fincapé na colaboración).

Destrución do biscoito (tamén acumulativa,  na que a responsabilidade do mal feito é compartida, e onde o perdón aparece implícito como algo natural, froito da comprensión mutua).

Resolución do problema (cando un plan non funciona, é sensato pensar outro que xusto pode ser a solución efectiva).

Ademais de actitudes e valores como a colaboración e a común asunción de responsabilidades, traballamos a comprensión, a tenacidade e a flexibilidade.

O texto gustou moitísimo. E máis aínda a visita do seu autor, Iago López, que como contacontos dramatizou, coa axuda de alumnado de 1º e 2º, a historia de Martiño.

Algúns dos espectadores foron seguindo de xeito espontáneo a evolución da historia nos seus respectivos libros.

Tras isto Iago respostou preguntas do alumnado. Interrogado sobre se podemos esperar un Cociñeiro Martiño II, afirmou que xa lle está dando voltas a unha nova aventura de Martiño, convertido xa en cociñeiro do Rei, na que lle desaparecen ingredientes de xeito misterioso.

O acto rematou co autor asinando os textos de xeito personalizado.

O CICLO DA AUGA

Este curso estudamos o Ciclo da Auga, reforzando e ampliando os primeiros contactos con este tema, que tiveron lugar o curso pasado.

Ademais de traballar o Ciclo como tal, fixámonos noutras cuestións como a auga potable e non potable, a necesidade da súa conservación e aproveitamento, a evaporación da auga do mar como paso esencial no mantemento do Ciclo da Auga, os cambios de estado da auga e a súa importancia no tempo atmosférico.

Para achegarnos á realidade, facendo unha observación controlada, levamos a cabo un experimento na aula:

En primeiro lugar fixemos unha disolución non saturada de sal en auga. Traballamos conceptos como disolvente e soluto, observando que, aínda que o sal seguía estando na auga despois de disolverse, non podiamos velo.

A continuación deixamos a auga salgada nun prato (para favorecer a evaporación mediante unha ampla superficie de contacto co aire) durante varios días, e aí tivo lugar o achegamento á investigación científica:

- Formulamos hipóteses:   -Non vai pasar nada.
                                        -O sal vai desaparecer.
                                        -A auga vaise conxelar...

- Observación paciente do proceso:  Cada día o alumnado miraba con curiosidade os cambios no experimento, e íanlle buscando algunha explicación ao observado. Así, cando de pronto apareceu sal cristalizado nas beiras do prato (unha vez evaporada a primeira cantidade de auga), a opinión xeral era que estaba apaecendo xeo. Teñamos en conta que non se podía tocar nada do que había na mesa de experimentación, polo que unicamente usaban o sentido da vista (e algúns o do olfacto) para a análise dos feitos.

-Ao aparecer as figuras prismáticas na auga, uns pensaban que non sabían o que estaba pasando, pero outros mantíñanse en que se trataba de xeo.

-Cando apareceron máis puntos sólidos no centro do prato, a meirande parte do alumnado empezou a opinar que se trataba de sal, pero que os prismas grandes eran xeo.

Por fin, despois de máis de quince días, a auga desapareceu por completo a xa todos vían claro que a auga se evaporara, e que o que había no centro do prato era sal.

Permiso para tocar e dous grandes descubrimentos:
- O QUE ESTÁ NAS BEIRAS DO PRATO ESTÁ DURO E PEGADO, E TAMÉN É SAL
- OS PRISMAS DESPÉGANSE FACILMENTE PERO NON ESTÁN FRÍOS, NON SON XEO, SON TAMÉN SALGADOS.

Conclusión: A auga evaporouse e agora está no aire da clase!!!, e o sal reapareceu unha vez desaparecida a disolución, pero cristalizado!!!

A partir de aquí investigación en Internet: - auga na Natureza en Galiza
                                                               - as salinas
                                                               - o sal

E froito dese traballo foi este mural feito por toda a clase.

VISITA DOS REIS MAGOS

O 21 de decembro visitaron o noso colexio as Súas Maxestades os Reis Magos de Oriente.

Recibímolos con emoción e cariño, e algúns con algo de temor tamén, porque o saben todo e teñen poderes, e porque no fondo case non os coñecemos.

Entregámoslles as nosas cartas, recibimos os seus agasallos e ao final fixémonos esta foto con eles.

Agora a descansar nestas vacacións, e a manter a ilusión de que nos traian, entre os Reis, Papá Noel e o Apalpador, o que lles pedimos.

Os maiores tamén temos ilusións. Que se cumpran as de todos nestas festas e no vindeiro ano!

RESULTADO DO CARTEL

Despois de debuxar e escribir, fixemos a montaxe sobre unhas caixas de luz. Escollemos unha cor laranxa moi clara porque era a que mellor resaltaba as cores de debuxos, letras e obxectos.

Contamos coa colaboración do mestre Fernando, e dun papá, Eduardo Pérez, que se encargou de facer as fotos. El mesmo vainas montar para despois envialas á Consellería de Educación.

Citamos tres obras de literatura infantil e xuvenil de Carlos Casares: O Galo de Antioquía, A Galiña Azul e a serie de relatos de Toribio, o neno inventor. A cuarta obra que aparece no cartel non está citada, pero si representada: As Laranxas máis Laranxas de tódalas Laranxas, que é unha obra de teatro moi do gusto do alumnado da clase.

Aquí amosamos o resultado cunhas fotos non elaboradas. Captan a montaxe tal e como se vía na clase.

Foto con luz natural:

Foto con efecto de luz (ambiente escurecido e caixas de luz acesas):

COMEZOU UN NOVO CURSO

De novo encetamos as tarefas cotiás.

Ao principio deste curso 2016-17 despedimos á profesora Bea e recibimos ao profesor Ángel, que vai impartir no noso grupo as materias de Educación Musical e Valores Cívicos e Sociais.

E case sen decatarnos de que o curso comezara participamos nunha interesante actividade:

USO RESPONSABLE  DA AUGA

Patrocinada polo Concello de A Coruña, recibimos unha charla informativa sobre a importancia da auga para a vida e a escaseza de auga potable no mundo. Como consecuencia aprendemos maneiras de usala de xeito máis racional, sen estragala, e a empregar a auga como un alimento saudable que debemos consumir periodicamente.

Información e hábitos saudables combinados para a formación integral do alumnado.

E TRABALLAMOS MÁIS E MELLOR

Porque medramos, sabemos máis e temos máis capacidade ca o curso pasado.

ARTE AUTÓCTONO

E desfrutamos de expresións artísticas propias da nosa cultura: música e danza.

O 9 de decembro, o grupo IAR interpretou para nós varias pezas musicais. Explicáronnos detalles dalgúns instrumentos. Animáronnos a acompañar a súa música coas nosas aportacións rítmicas e cantando. E finalmente bailamos dúas pezas, como traballo de expresión corporal adaptada ao ritmo.

O XOGO COMO FONTE DE APRENDIZAXE

Somos maiores, pero non tanto como para non ser capaces de aprender xogando.

Memoria e ioga

Buscamos entre fichas con diferentes posturas de ioga dúas  iguais. Cando o conseguimos, realizamos a postura de ioga atopada e así gañamos. Traballamos a atención, a memoria visual e o control postural (coa representación mental da postura).

Pinchos e costura

Xogos para mellorar a psicomotricidade fina, a coordinación viso-motora e o ritmo, e cunha atractiva porcentaxe de creatividade.

Bloques creativos

Bloques cos que se poden compoñer caras, formas e labirintos. Creando, traballamos conceptos espaciais.

Puzzle

Neste caso magnético. Traballamos o espazo, a atención e a psicomotricidade fina.

Construcións

Elaboración de edificios imitando modelos con dificultade crecente, e utilizando unhas pezas polivalentes coas que o reto é controlar, dentro do espazo, posicións, formas, encaixes...

Atrapabólas

Meter a bóla dentro do recipiente, empregando unha soa man. Reto de coordinación. Non é tan fácil como pode parecer!

CARTEIS DE CARLOS CASARES

A Real Academia Galega adicará o próximo día das Letras Galegas 2017 á figura de Carlos Casares. Este curso, por iniciativa do Equipo de Dinamización Lingüística do Colexio, imos participar no concurso de carteis que convoca a Consellería de Educación. Os carteis do colexio gañador serán repartidos a todos os colexios de Galicia.

Trátase de representar, en tan só dez carteis, a obra, tempo e vida do personaxe homenaxeado, mediante representacións plásticas creativas.

Ao noso curso tocoulle un cartel que presenta obras literarias de Casares escritas para nenos.

De momento iniciamos o proceso. Deseño de figuras alusivas ás obras que queremos tratar.

Os resultados xa se verán.