XARDÍN

Na aula cultivamos plantas e valorámolas como seres vivos, necesitados de terra, auga, aire e luz, observamos os fototropismos, diferentes formas de reprodución das mesmas (gallo, xemación de folla, floración, bulbos con hibernación, sementes) e a xerminación de lentellas. A este rincón da aula o alumnado chamoulle de xeito espontáneo "o xardín".

PROXECTO "ANIMAIS EN PERIGO DE EXTINCIÓN"

Reforzando a estratexia de aprendizaxe xa traballada, consistente na procura de información na Internet e a súa xestión, confeccionamos un mural coas principais características de especies animais da xeografía española en perigo de extinción, fixándonos nas principais causas que provocaron esta situación e en como evitalas. Deste modo concienciámonos da importancia de protexer estes animais para fomentar o respecto pola biodiversidade.

OLEIRO

O pasado 20 de xuño recibimos no Centro a visita dun oleiro de Buño. Explicou brevemente a preparación do barro e das pinturas empregadas para a súa decoración, e co seu tradicional torno de pé fixo unha cumprida demostración da antiga técnica dos alfaremes.

A continuación cada alumno/a tomou contacto cun anaco de barro, co que modelou recipientes e figuras manualmente ou usando moldes.

Mesmo houbo a oportunidade de que algúns probasen a traballar no torno.

A experiencia foi moi enriquecedora, pois aprenderon observando e por experimentación directa, e así tomaron contacto cun oficio artesán tradicional.