O día 4 de abril, dentro do programa municipal de Educación, visitamos o Museo Arqueolóxico no Castelo de San Antón.
Na aula traballamos previamente cal foi a razón de ser do castelo, e como constituía, xunto co desaparecido de San Diego, a principal defensa do porto.
A visita aportou informacións sobre o edificio: usos ao longo do tempo, funcións das súas estancias, personaxes relacionados con el a través da historia...
Tamén informacións igualmente interesantes sobre pezas alí gardadas, dende a prehistoria (Paleolítico, Neolítico, Idade dos Metais), pasando pola civilización castrexa, a romanización e a Idade Media, ata chegar ás Idades Moderna e Contemporánea.
E houbo tempo para observar o fondo mariño, e o ecosistema acuático da zona próxima.
O tempo atmosférico acompañounos, de modo que a visita resultou completa ao podermos ver os exteriores do castelo con comodidade.
Chegados á clase, o alumnado expresou de xeito escrito e plástico o que máis interesante lle resultara. Maioritariamente o máis atractivo da visita foi o propio castelo, e de forma especial o alxibe e as escaleiras de caracol que dan acceso á azotea.
Con todas estas aportacións confeccionaremos un libro para a aula.
